- Nesten fire hundre betalande besøkande kan leiar i museumsstyret, Tor Sindre Steinsvik, fortelje om til Herøynytt. I tillegg kjem alle borna som er under sju år. Med slike besøkstal seier det seg sjølv at parkeringssituasjonen vart noko vanskeleg på staden, det kan underteikna konstatere.

Tidleg denne sundagen regna det, men sola kom fram i det marknaden skulle opne i 12-tida. Tema for dagen var ”Løynde skattar. Spor i landskapet.” Når ein går over brua til sjølve Herøy Gard vert stemninga til å ta og føle på. Vel inne i hovudhuset er det masse fint handarbeid å sjå. Når Herøynytt var på staden, var det spesielt stor samanstimling rundt bunadar i andre etasje.


Praten sat laust ved plassen som var avsett for bunadar. 

Det var fleire barnefamiliar å spore på staden og det var godt med folk gjennom heile dagen. Hus og naust var fylt med broderi, bakst, bunadssaum, snordreiing til smiing, garnbinding, seglmaking, båtbygging og mykje meir.


Odd Brune(t.v) frå Ulsteinvik syner sine produkt for museumsstyrar Håvard Hatløy.