Det er kravd inn like mykje skatt i Herøy og Ulstein som i Molde i dei sju første månadene i år.

I løpet av dei sju første månadene av 2012 vart det kravt inn over 2 milliardar kroner i skatt i dei to kommunane Ulstein og Herøy til saman.

Det betyr at økonomien i dei to kommunane, målt utifrå skatteinngangen frå bedrifter og lønsmottakarar, samla sett er like stor som i Molde kommune. Skatteinnkrevjinga i Ulstein kommune er den største mellom Bergensområdet og Ålesund.

Rekneskapsoversynet som Statistisk Sentralbyrå no har lagt ut pr. juli 2012, viser elles at skatteinnkrevjinga i Sande er like stor som i Vanylven – trass i at Sande har langt færre innbyggarar.

Med unntak for Vanylven kan alle kommunane på Søre Sunnmøre gle seg over auke i skatteinngangsvolumet. I prosent er auken størst i Sande (+ 18 %), Herøy (+ 15,7 %) og Hareid (+ 12,9 %).

Når det gjeld skatt til eigen bruk, kjem Sande best ut med ein auke på 19,1 prosent. Deretter har Herøy + 11,2 prosent , Hareid + 7,8 prosent, Volda + 6,5 prosent, Ørsta + 4,8 prosent, Ulstein + 4,6 prosent og Vanylven + 2,8 prosent.

Innkravd skatt i dei sju kommunane pr. juli 2012 var:
Ulstein 1.065,400
Herøy 958.200
Ørsta 692.300
Volda 521.900
Hareid 318,4
Vanylven 188,1
Sande 188,0